bourjois healthy mix anti fatigue foundation | فاونديشن بورجوا هيلثي ميكس

من خلال تجربتي المبدئيه للفاونديشن اقدر اشاركم بعض المعلومات عن فاونديشن بورجوا 
 HEALTHY MIX ..

اول شيء بتلاحظونه هو المعلومات المكتوبه على عبوة الفاونديشن ، جداً احترم الشركات اللي تشارك الزبائن المعلومات والمكونات والتفاصيل 
يعتبر من كريمات الاساس اللي تجمع بين العنايه بالبشره وكريم الاساس 

بمجرد ماتحطونه على البشره بتلاحظون قوامه سائل كريمي وخفيف على البشره جداً وسهل التوزيع 
ولو مهتمين بفاونديشن يخفي عيوب البشره واثار الحبوب والهالات فـ هذا الفاونديشن غير ملائم لكم 
لانه خفيف وتغطيته متوسطه ، تقدرون تعيدون عليه اكثر من مره بس ابداً مايسوي تغطيه كامله 

وخصوصاً للناس اللي عندهم حب الشباب او اثار حب الشباب ..

يناسب البشره الجافه او العاديه اكثر بحكم انه مرطب بالدرجه الاولى
الحلو بالفاونديشن لانه خفيف على البشره تقدرون تستخدمونه بأي وقت واي فصل من فصول السنه 
لانه تركيبته مو نفس بقية الفاونديشن اللي يعطيكم تغطيه شامله ، مابتحسون بوجود طبقات على البشره من كثر ماهو خفيف ولطيف ..
بنظري يناسب اللوكات الصباحيه جداً لانه يعطي اشراقه وبشره حيويه ، فـ يناسب البنات بالدوام او الجامعه او المشاوير الصباحيه الخفيفه وممكن تاخذونه معاكم بشنطة الميك اب الصغيره لانه حجمه مناسب .

في منه عدة الوان و درجات تناسب البشره الفاتحه او البشره المحايده او السمراء 

و آخر معلومه برغم من جودته العاليه وتركيبته الصحيه سعره جداً مناسب و سهل تلقونه في اغلب محلات المكياج 
يتميز فاونديشن برجوا هيلثي بتركيبه مميزه لمحاربة ظهور علامات تقدم العمر 

 لانه يحتوي على فيتامين C اللي يبعد عن البشره علامات الارهاق والتعب ..

 يحتوي على فيتامين E المضاد للأكسده ، واللي يعمل على مكافحة شيخوخة البشره ..
من مكوناته ايضاً فيتامين B5 اللي يحافظ على مرونة وحيوية البشره ..

يحتوي على مشتق حمض الهيالورونيك الذي يقدم للبشره نضارة وترطيب لمدة 24 ساعة .
سهل التوزيع بسبب قوامه السائل اللطيف على البشرة .
يحتوي على خلاصة الفواكه المعززة لإشراقة البشرة بنسبة 70% .
يمتاز بتركيبة غير كوميدوجينك أي لا تسبب انسداد المسام وتسمح لها بالتنفس .

هذا موقع بورجوا الرئيسي Bourjois وهذي الصفحه اللي تلقون فيها معلومات وتفاصيل الفاونديشن HEALTHY MIX
  وشكراً ياجميلات على المتابعه ..