تجربتـي مع المنتجـات الكوريـه | HOLIKA HOLIKA

 مرحبـا بنـات ..

اليوم بنقل لكم تجربتي مع منتجات كوريه لطيفه جداً من محل هوليكا هوليكا ، وهذي نبذه بسيطه عن محلات هوليكا 

هوليكا هوليكا هي شركة تجزئة كورية متخصصة ببيع المستحضرات التجميلية ، تقدم هوليكا هوليكا منتجات فريدة من نوعها ، ضمن غلاف يجذب المستهلكين الشباب ومتابعي الموضة الذكور والإناث . يرتكز كلّ ذلك على منتجات عالية الجودة مصنّعة بمكوّنات فخمة وأسعار بمتناول الجميع  ..

وهذا انستقرام الفرع الموجود في قطر  HOLIKA HOLIKA   وهذا رابط موقعهم  Holika Holika  

وهذي الفتره في تخفيضات و عروض تقدرون تستفيدون منها ..

نبدأ بـ غسول الجسم اللطيف |  Cherry Blossom Body Wash  :

هذا الغسول حرفياً كأنه ماي ورد من كثر ماريحته ورود او ازهار و بداخله في ورود مجففه يسمونها cherry blossom 

او ازهار الكرز  او ( الساكورا ) اللي تعتبر الزهره الوطنيه لليابان  ، الغسول جداً لطيف على البشره وتركيبته جداً غنيه وبيعطيكم لمسه ناعمه

 على البشره اثناء الاستحمام وبتلاحظون ترطيب من اول استخدام بسبب وجود ازهار الكرز (الساكورا ) 

اللي من ضمن فوائدها حماية الجلد ومده بالطاقة والحيوية ومساعدة الجسم في عملية التجديد وبعد يعتبر مضاد للأكسده ..

 الباليت الكيوت | Palette Sparkling Rose : 

الباليت هذا من شكله ومن الالوان على طول جاني الالهام بلوكات صباحيه خفيفه وانيقه ، الباليت خفيف وحجمه ممتاز 

والالوان جداً جميله وسهل دمجها على البشره وتثبت لفتره مناسبه ، وبشكل عام الالوان الورديه الترابيه تضيف لمسه انثويه لمكياجكم ..

بعض الالوان فيها لمعه خفيفه وتقريباً ماراح تكون ملحوظه الا لو كان لوك صباحي والجو مشرق 

ونصيحتي لكم عشان تبين الالوان اكثر وتثبت ، استخدموا برايمر قبل الشادو  ..

ماسك قبل النوم | Water Melon Aqua Sleeping Mask :

ماسك ماقبل النوم وظيفته الاساسيه ترطيب وتغذية وعلاج البشره  اثناء النوم ، الماسك الرهيب هذا مصنوع من البطيخ 

و ريحته لطيفه جداً وقوامه كريمي سلس وبسرعه تمتصه البشره ويعتبر من مضادات الاكسده  ، ويناسب البشره الجافه والحساسه 

بحكم انه مرطب من الدرجه الاولى و يهدي تهيج البشره ..

طريقة استخدامه بأختصار : تحطون الكميه المناسبه وتوزعونها على البشره بعيداً عن منطقة تحت العين 

 وثاني يوم  تغسلونه بماي دافي ، ويفضل استخدامه مرتين الى ثلاث مرات بالاسبوع  .. 

ملاحظه :  يجي معاه ملعقه صغيره تقدرون من خلالها تعرفون الكميه المناسبه ..

واخيراً نوعين من ماسكات HOLIKA HOLIKA :

الاول هو ماسك البشره الوردي المعزز بزيت الورد الدمشقي ممتاز جداً للترطيب العميق من اول استخدام  ، تركيبة الماسك 

مناسبه لعلاج التصبغات و آثار حب الشباب و يساعد على تهدئة البشره ويحارب الالتهابات  ويعطي اشراقه للبشره الباهته ..

الماسك الثاني هو ماسك للشفاه على ثلاث خطوات و مناسب جداً للشفاه الحساسه الرقيقه و الجافه  ..

الخطوه الاولى : هي ضمادة تحتوي على مستخلصات نباتية تقشر وتغذي بلطف .

الخطوه الثانيه : قناع الهيدروجيل المهدئ والمرطب ومن اهم مكوناته زبدة الشيا ، و زيت بذور الجوجوبا .

الخطوه الثالثه : زيت الشفاه الفاخر مع كل الفوائد العلاجية للعسل وغذاء ملكات النحل ..

لو استخدمتوا المجموعه هذي بالليل بتلاحظون فرق باليوم الثاني .

واخيراً هذي كانت هديه صغيره من HOLIKA HOLIKA :

هذي مجموعه يقدمونها لكم في حال تسوقتوا منهم وهي عباره عن مجموعه صغيره للعنايه بالبشره ، 

حجمها جداً مناسب لشنطة المكياج او للسفر او الرحلات ..

Thanks HOLIKA HOLIKA

وهذا فلوق عرضت فيه المنتجات لو حابين تشوفونه 

enjoy